શ્રી શત્રુંજય નવકારધામ

શ્રી શત્રુંજય નવકારધામ તળેટીથી ૫ કિ.મી. ના અંતરે, સોહામણી શત્રુંજી નદીના તીરે, શ્રી હસ્તગિરિ તીર્થના રસ્તે, જીવાપુર ગામ પાસે શ્રી શત્રુંજયની પૂર્વભાગની તળેટીમાં આવેલ પાવનભૂમિછે.

નંદીવર્ધન પ્રસાદ તરીકે પ્રખ્યાત ગિરિરાજના ૩૫૦૭ જિનાલયોમાં શિરમોર મૂળનાયક શ્રી આદિનાથ દાદાના મુખ્ય જિનાલયના શિખરના દર્શન થઇ શકે તેવી આ પુણ્યભૂમિ છે.

દરરોજની એક હજાર બાંધી નવકારવાળી અને જીવનકાળ દરમ્યાન અડતાલીશ કરોડથી વધુ નમસ્કાર મહામંત્રનો જાપ કરનાર પરમ પૂજ્ય આચાર્ય ભગવંત કલાપૂર્ણસૂરિજીના આજ્ઞાવર્તી પરમ પૂજ્યસાધ્વીજી અનુપમાશ્રીજીની આ સમાધિભૂમિ છે.

સુંદર જિનાલય, શ્રાવક અને શ્રાવિકા ઉપાશ્રય, જાપ કેન્દ્ર, સંશોધનકેન્દ્ર, ધર્મશાળા, ભોજનશાળા આદી સર્વ સુવિધાઓથી યુક્ત આ તીર્થ સાધક જીવો માટે એક સુંદર સાધનાભૂમિ બની રહેશે.

ભવિષ્યમાં શત્રુંજય ગિરિરાજ સમીપેચાતુર્માસ, નવ્વાણું, ઉપધાન, આધ્યાત્મિક શિબિર, જાપ અનુષ્ઠાન વગેરેને કારણે આ સુંદર આરાધનાભૂમિ પણ બની રહેશે.

શત્રુંજયના મુખ્ય શિખર, નવટૂંકના દેરાસર, કદંબગીરી, હસ્તગિરિ આદિના દર્શન અહીંથી થઇ શકે છે તેથી છ ગાઉ અને બાર ગાઉના સંઘ માટે આ વધામણાંભૂમિ બની રહેશે.

શાશ્વત ગિરિરાજ અને શાશ્વત નવકાર મંત્રના શ્રેષ્ઠ આલંબનથી આત્મા થી પરમાત્મા બનવાની યાત્રાની જ્યાં સહજ શરૂઆત થઇ શકે તેવી આ આલંબનભૂમિ બની રહેશે.

શ્રી શત્રુંજય નવકારધામનું મુખ્ય આકર્ષણ નવકાર સાધનાડોમ છે, એક પણ સ્તંભ વગરના ૯૦૦૦૦ ફૂટના આ વિશાળ ડોમમાં ત્રણ બાય ત્રણ ફુટના કુલ ૬૮૦૪ વિભાગ હશે. એક સાથે ૬૮૦૪ભાગ્યશાળીઓ બેસીને સમવસરણયુક્ત ચતુર્મુખ પરમાત્મા સમક્ષ જાપ સાધના કરી શકે તેવી વિશિષ્ટ વ્યવસ્થા થશે.

મહામંત્રના એક અક્ષરના ઉચ્ચારથી સાત સાગરોપમ, એક પદના ઉચ્ચારથી પચાસ સાગરોપમ, એક પુરો નવકાર ગણવાથી પાંચસો સાગરોપમ અને એકસો આઠ નવકાર ગણવાથી ચોપન હજારસાગરોપમના પાપનો નાશ થાય છે. મનની એકાગ્રતાપૂર્વક કરેલો જાપ દુર્ગતિ નાશ, પાપ વિનાશ, પુણ્ય વિકાસ કરી તીર્થકર નામકર્મનો બંધ કરાવે છે. નવકાર જાપથી આઠ સિદ્ધિ અને નવનિધિની પ્રાપ્તિથાય છે.

કરણ કરાવણ ને અનુમોદન સરીખા ફળ નિપજાયો અન્વયે માત્ર એક જ વ્યક્તિ નહિ પરંતુ અનેક પુણ્યશાળીઓ શાશ્વત ગિરિરાજ સમીપે સુકૃતના સહભાગી બની શકે અને સમૂહ પુણ્યબળ ભેગું થાય તેવીગુરુભગવંતની વિશેષ પ્રેરણાને કારણે ટ્રસ્ટે એક સુંદર સુકૃત યોજનાનો વિચાર કર્યો.

શાશ્વત સુકૃત યોજના અંતર્ગત શ્રી શત્રુંજય નવકારધામ ડોમમાં ૧૦૮૦૦૦/- ના ૬૮૦૪ ભાગ્યશાળીના નામ વહેલો તે પહેલો ના ધોરણે લેવામાં આવશે. શરૂઆતમાં આવેલ લાભાર્થીઓને સમવસરણમાં બિરાજમાનચતુર્મુખ પરમાત્માની નજીક બેસવાનું સ્થાન મળશે.

શાશ્વત સુકૃત યોજનાના નામોની સર્વ પ્રથમ જાહેરાત ૧૧ ડિસેમ્બર ૨૦૧૭ ના રોજ શિલાન્યાસ સમયે કરવામાં આવશે. ત્યારબાદ લાભ લેનાર ભાગ્યશાળીઓના નામ દર અઠવાડિયે નવકારધામનીવેબસાઈટ ઉપર અપડેટ કરવામાં આવશે.

નવકારધામની વધુ માહિતી આપ અમારી વેબસાઈટ www.navkardham.com પરથી મેળવી શકશો

શ્રી શત્રુંજય નવકારધામ પરિવાર ચેરીટેબલ ટ્રસ્ટના પ્રણામ.
શ્રી અરવિંદભાઈ તારાચંદ શાહ - પ્રમુખશ્રી